بەناوی خوای گەورە و میهرەبان
بە بۆنەی هاتنەوەی جەژنی قیامەی حەزرەتی مەسیح (سڵاوی خوای لێ بێت)، پیرۆزباییەكی گەرم ئاراستەی خوشك و برا مەسیحییەكان لە كوردستان و عێراق و سەرتاسەری جیهان دەكەم.
سوپاس بۆ خودای گەورە گەلی كوردستان بە هەموو پێكهاتەكانیەوە خاوەنی كولتووری دەوڵەمەند و مرۆڤپارێزانەی پێكەوەژیان و ئاشتیخوازە كە ڕیشەی لە مێژوودا هەیە و هزری توندڕۆیی و تیرۆر بە هیچ شێوەیەك ناتوانێ ئەو كولتوورە لاواز بكات و درز لەنێو پێكهاتەكانی كوردستان دروست بكات.
لەم بۆنە پیرۆزەدا جارێكی تر دووپات دەكەمەوە كە ئێمە هەموومان لە وڵاتەكەماندا یان پێكەوە دەمرین یان بە سەربەرزی پێكەوە دەژیین. تیرۆریستانی دوژمنی خودا و مرۆڤایەتی لەسەر دەستی پێشمەرگە تووشی شكست هاتوونە و خوشك و برا مەسیحییەكانمان بە سەربەرزی دەگەڕێنەوە ناوچەكانیان و پێویستە لەدوای لەناوچوونی تیرۆریستان ڕێوشوێنی و دڵنیاییەكی وا بە خوشك و برا مەسیحییەكانمان و پێكهاتەكانی تر پێ بدرێت كە بتوانن بە ئاسوودەیی و ئاشتی بژیین و چیتر كارەساتەكان دووبارە نەبنەوە.
خوشك و برا و هاووڵاتیانی مەسیحیی كوردستانیش لەوە دڵنیا دەكەمەوە كە لە هەموو بارودۆخێكدا لە سایەی كولتووری پێكەوەژیانی كوردستان وەك پێكهاتەكانی دیكە بە یەكسانی ژیان بەسەر دەبەن و ئاسایش و كەرامەت و مافەكانیان پارێزراوە.
جارێكی دیكە پیرۆزبایی ئەم جەژنەتان لێ دەكەم و هیواخوازم ئاشتی باڵ بەسەر ناوچەكەمان و هەموو جیهاندا بكێشێت.
مسعود بارزانی
سەرۆکی هەرێمی کوردستان
27-3-2016
بەناوی خودای بەخشندە و میهرەبان
هاووڵاتیانی خۆشەویستی كوردستان
بەبۆنەی جەژنی نەتەوەیی نەورۆز و سەری ساڵی تازەی كوردی پیرۆزبایی لە گشت خەڵكی كوردستان بە هەموو پێكهاتە ئایینی و نەتەوەییەكانی دەكەم. پیرۆزبایی لە خانەوادەی سەربەرزی شەهیدان و پێشمەرگە قارەمانەكان دەكەم كە بە خوێن و قوربانیدانیان گەل و نیشتیمانیان پاراستووە. لەم بۆنەیەدا هەزاران سڵاو دەنێرین بۆ گیانی پاكی شەهیدەكانمان كە ڕۆحی بێگەردیان هەوێنی سەربەرزی و ژیانی گەلەكەمانە.
نەورۆز بۆ گەلی كوردستان هەڵگری پەیامی ڕووناكی و نوێبوونەوە و ئازادییە. بە درێژایی مێژووی گەلی كوردستان لە نەورۆزدا زوڵم و ستەم و تاریكی تێكشكاوە و سەركەوتن و ئازادی بەدیهاتووە. زۆربەی سەركەوتن و خۆشی و ناخۆشییەكانی گەلی كوردستان لە نەورۆزدا ڕوویان داوە و مێژووی ئێمەیان نەخشاندووە و، نیشانەی ئەوەیە كە كوردستان زوڵم قبووڵ ناكات و كۆتایی بە چەوسانەوە و ژێردەستی دەهێنێت.
نەورۆزی ئەمساڵ لە كاتێكدایە كە ناوچەكەمان بە گۆڕانكاریی قووڵدا تێدەپەڕێت و گەلەكەمان لەبەردەم دەرفەتی مەزن و هەڕەشە دایە. ئەگەرچی پەلاماری تیرۆریستان و گوشاری هەمە لایەنەی نەیاران بۆ ئەوە بوو گەلی كوردستان دەستبەرداری پێشكەوتن و مافە ڕەواكانی بێت بەڵام بە خۆڕاگریی خەڵك و گیانفیدایی پێشمەرگە دوژمن تێكشكا و گەلەكەمان لە هەموو كاتێك زیاتر پێداگرە بۆ ئەوەی بگاتە شكۆ و ئازادی و خاوەنی چارەنووسی خۆی بێت. پیرۆزبایی نەورۆز لە خوشك و براكانم لە پارچەكانی دیكەی كوردستانیش دەكەم و هیوای خۆشی و سەركەوتنیان بۆ دەخوازم. لەگەڵ ئەوە داین كە كێشەی كورد لە پارچەكانی تر بە ڕێگەچارەی ئاشتیانە چارەسەر بكرێت. زۆر نیگەران و خەمبارم بە قووڵبوون و ئاڵۆزتربوونی گرژییەكانی توركیا، بۆ ئەوەی ڕێگە لە كارەساتی مەزن بگیرێت و نەبێتە شەڕی نەتەوەیی، هیوادارم شەڕ و خوێنڕێشتن ڕابگیرێت و گرژییەكان زیاتر تەشەنە نەكەن. لەبارەی سووریایش سیستەمی پێشنیاركراوی فیدڕاڵی بە چارەسەرێكی گونجاوی دەزانین بۆ داهاتووی سووریا و بۆ سەركەوتنی دەبێ پێكهاتە و لایەنەكانی سووریا لەسەری ڕێكبكەون.
بەپێویستی دەزانم لەم بۆنەیەدا لەبارەی چەند پرسێك بۆچوونی خۆم ڕاشكاوانە بە ئێوەی خۆشەویست ڕابگەیێنم.
لەبارەی قەیرانی سیاسیی هەرێم و بابەتی سەرۆكایەتی هەموو هەوڵێك لەگەڵ حزبەكان درا و ئەوەی پێویست بوو بۆ چارەسەری دۆخەكە لەگەڵ حزبە سیاسییەكان باس كراوە. حزبەكان بڕیاریان لەسەر ئەوە نەدا هەڵبژاردنی سەرۆك بكرێت، یان بەڕێزێك دەستنیشان بكرێت بۆ وەرگرتنی پۆستی سەرۆكایەتی و بڕیاریان بۆ ئەوەیش نەدا كە بە لەبەرچاوگرتنی شەڕ و گرفتەكانی دیكە بارودۆخی ئێستا هەتا هەڵبژاردنەكانی 2017 وەك خۆی بمێنێتەوە و كار بۆ چارەسەركردنی گرفتەكانی خەڵك بكەن. بە داخەوە نەیانتوانی چارەسەری دۆخەكە بكەن و بەشێكیان تەنیا كەوتنە تۆمەتبەخشین و قووڵتركردنی گرفتەكان. كە كاریش گەییشتە ئەوە، هیچ بایەخێك بۆ تۆمەت و هەڵسوكەوتیان نامێنێت. ئێستایش جەخت لە هەمان هەڵوێستم دەكەمەوە كە لایەنەكان لەسەر سێ بژاردەی هەڵبژاردنی سەرۆكایەتی یان دەستنیشانكردنی كەسێك بۆ وەرگرتنی پۆستی سەرۆكی هەرێم یان بڕیاردان لەسەر مانەوەی دۆخەكە هەتا هەڵبژاردنی داهاتوو ڕێكبكەون و كۆتایی بەو پرسە بهێنن. لەبارەی پڕۆسەی سیاسیی هەرێمیش لە 23ـی حوزەیران بنەمای ئەو تەوافوقە تێكدرا كە حكوومەت و پارلەمانی لەسەر بنیاتنرا بوو، بۆیە باشترین چارەسەر ئەوەیە پارلەمان كارا بكرێت و دەستەی سەرۆكایەتیی پارلەمان و حكوومەتێكی تازە پێكبهێندرێت.
سەبارەت بە قەیرانی داراییش كە هۆكارەكانی بۆ بڕینی بودجەی هەرێم و تێچوونەكانی شەڕ و میوانداریی سەدانهەزار ئاوارە و دابەزینی نرخی نەوت و كەموكوڕییەكانی بەڕێوەبردن دەگەڕێتەوە، وێڕای ئەوەی سوپاسی بێ پایانی تەحەمول و خۆڕاگریی گەلی كوردستان دەكەم لەوە دڵنیام كە قەیرانەكە كاتییە و پشت بە خودا گەلەكەمان بە سەركەوتوویی قەیرانەكە تێدەپەڕێنێت. ئەو پڕۆژە چاكسازیانەی ڕاگەیێندراون كاری جددی لەسەر كراوە و ئەنجامەكانیشی بە زوویی دەدیترێن و یارمەتیدەر دەبێت بۆ تێپەڕاندنی قەیرانی دارایی و دەستەبەركردنی دادپەروەری. پێویستە قەیرانی دارایی وەك هەلێك سەیر بكەین بۆ پشتبەستن بە توانا و سەرمایە ناوخۆییەكان و دەستەبەركردنی سەرچاوەكانی تری داهات و هەروەها پێداچوونەوە و ڕاستكردنەوەی هەڵەكان و توندوتۆڵكردنی سیستەمی كارگێڕی و كاركردن بۆ بنیاتنانی وڵاتێكی بەرهەمهێن، بەشێوەیەك كە لە خزمەتی خۆشگوزەرانی و دادپەروەری بێت بۆ گەلەكەمان. ئومێدی زۆرم هەیە كۆتایی بە قەیرانی دارایی بێت و چاكسازییەكانیش سەركەوتوو بن و هیچ قەیران و كۆسپێكیش ناتوانێ ڕێگر بێت لەبەردەم پڕۆسەی چاكسازی و ئەوانەی بە هەر هۆكارێك دژی چاكسازی دەوەستن و لە هەوڵی نائومێدكردنی خەڵكن دواجار ئەنجامەكەی دەبینن.
جەماوەری سەربەرزی كوردستان
لە سەرەتای دروستبوونی دەوڵەتی عێراق هەتا ساڵی 2003 كە دەوڵەتێك بوو لەسەر بنەمای شەراكەتی نێوان كورد و عەرەب، بەشی گەلی كوردستان لەو شەراكەتە جینۆساید و ئەنفال و كیمیاباران و بەعەرەبكردن و هەوڵدان بۆ تواندنەوەی گەلی كوردستان و تێكدانی چوارهەزار و پێنجسەد گوندی كوردستان و بەكارهێنانی سامانی كوردستان لەدژی خەڵكی كوردستان بوو. لە دوای ڕاپەڕینی 1991 و لەپێناو كردنەوەی لاپەڕەیەكی تازە و بەدیهێنانی پێكەوەژیاندا گەلی كوردستان گەورەیی نواند و پەنای بۆ تۆڵە نەبرد، تەنانەت لەپێناو كۆتاییهێنان بە نەهامەتییەكان و بۆ ئاگاداربوون لە چارەنووسی دەیانهەزار بێسەروشوێنی ئەنفال، وەك شاندی بەرەی كوردستانی چووین بۆ بەغدا و چاومان بە بكوژانی گەلەكەمان و تاوانبارانی بەعسیش كەوت بەڵام دەستەڵاتدارانی عێراق ئەو پەیامە بەرزەی گەلی كوردستانیان وەرنگرت و بەردەوام بوون لە ملهوڕی و سەرەڕۆییان. دوای 2003 هەر ئەوانەی لەسەر شانی گەلی كوردستان بوون بە دەستەڵاتداری عێراق نانی خەڵكی كوردستانیان بڕی. هێشتا دیار نییە كە چۆن مافیان بە خۆیان داوە نانی خەڵكی كوردستان ببڕن؟ بۆ پشتیان لە پەیمان و بەڵێن و ئیمزاكانیان كرد؟ دەمەوێ زۆر ڕاشكاوانە ڕایبگەیێنم كە گرفتی سەرەكی فەرهەنگ و عەقلیەتێكە كە ڕێگە نادات پێكەوەژیان و شەراكەت جێگەی خۆی بگرێت و ناتوانێ پابەندی دەستوور بێت و شەراكەتی گەلەكەمان قبووڵ بكات. بۆیە با خۆمان هەڵنەخەڵەتێنین ئێمە دوو ڕێگەمان لەبەردەمە. یان دەست لە هەموو شتێك هەڵگرین و قوربانیدان و خەباتی سەدساڵەی خۆمان پشتگوێ بخەین یان دەبێ ئەو بارودۆخە و سرووشتی پەیوەندی لەگەڵ بەغدا گۆڕانی بەسەردا بێت. بەردەوامبوونی ئەو وەزعەی ئێستا لە بەرژەوەندیی هیچ لایەك نابێت. چونكە ئێمە دوای ئەو هەموو قوربانیدانە پاشكۆیی قبووڵ ناكەین و فەرهەنگی باڵادەستی دەستەڵادارانی بەغدایش شەراكەت بە گەلی كوردستان ڕەوا نابینێت. بۆ ئەوەی لە شەڕ و كێشەكان دوور بكەوینەوە و بتوانین خۆمان بپارێزین و گەشە بە ژیانی خۆمان بدەین دەبێ چارەنووسی خۆمان لە دەستی خۆماندا بێت. گەلی ئێمە چیتر ناتوانێ تەحەمولی كارەسات و نەهامەتی بكات و دەبێ لە ئاشتیدا بژییت و پێویستە هەموو لایەك و دراوسێكانمان لە ئازار و داوا ڕەواكانی گەلی كوردستان بگەن. ویستی سەربەخۆیی گەلی كوردستان ویستێكی ئاشتیخوازانەیە و هەڕەشە نییە بۆ هیچ لایەك و دەمانەوەێ بە خۆشی و لێكتێگەییشتن و دوور لە گرژی و توندوتیژی لەگەڵ بەغدا بگەینە ئەنجام. هەر بۆ ئەو مەبەستەیش بەر لە ئەنجامدانی ڕیفراندۆم، هەرێمی كوردستان دەكەوێتە دیالۆگێكی جددی و ڕاستگۆیانە و ڕاشكاوانە لەگەڵ بەغدا بۆ ئەوەی چارەسەری كێشە و پەیوەندییەكانیان بكەن.
ئەوانەیشی لەناوخۆی كوردستاندا بەرانبەر مافی سەربەخۆیی دوودڵ و بەدگومانن و ستراتیژییان تێكدانی ئاساییشی خەڵكی كوردستانە، دەكەونە بەرەی دژی سەربەخۆیی گەلی كوردستان و، ئەوانەیش كە دەڵێن هێشتا كاتی سەربەخۆیی نییە، شانازیی ئەو دەستكەوتەی گەلی كوردستانیان بەرناكەوێت و بەرپرسیش نابن لە هیچ ئەگەرێك.
ئیرادەی گەلی كوردستان لەسەرووی هەموو ویست و ئیرادەیەكە، دۆزی گەلی كوردستان ڕەوایە و شاییستەی گرانبەهاترین دەستكەوتە چونكە لەڕێگەی ئازادیدا قوربانیی بێهەژماری داوە.
نەورۆزتان پیرۆز و هیوای شادی و بەختەوەریتان بۆ دەخوازم.
مسعود بارزانی
سەرۆكی هەرێمی كوردستان
20ـی 3ـی 2016
رۆژی دووشه‌ممه 28ـی 12ـی 2015 به‌ڕێز مسعود بارزانی سه‌رۆكی هه‌رێمی كوردستان پێشوازی له سه‌لیم ئه‌لجبوری سه‌رۆكی ئه‌نجوومه‌نی نوێنه‌رانی عێراق كرد.
له دیدارێكدا سه‌رۆكی ئه‌نجوومه‌نی نوێنه‌رانی عێراق پیرۆزبایی سه‌ركه‌وتنه‌كانی پێشمه‌رگه‌ی له سه‌رۆك بارزانی كرد و ده‌ستخۆشی له قاره‌مانێتی و ئازایەتیی هێزی پێشمه‌رگەی كوردستان كرد لە ڕووبەڕووبوونەوەی تیرۆریستانی داعش و هیواشی خواست به هیمه‌تی هێزه‌كانی عێراق و پێشمه‌رگه و پشتیوانیی هێزە هاوپەیمانەكان ناوچه‌كانی دیكه‌یش له‌ده‌ست تیرۆریستانی داعش ئازاد بكرێن.
له به‌شێكی دیكه‌ی دیداره‌كه‌دا سه‌رۆكی ئه‌نجوومه‌نی نوێنه‌رانی عێراق ده‌ستخۆشی له سه‌رۆك بارزانی و حكوومه‌ت و خه‌ڵكی هه‌رێمی كوردستان كرد بۆ له باوه‌شگرتن و حه‌واندنەوەی ئاوارە و لێقەوماوانی پارێزگاكانی عێراق كه به‌هۆی داگیركردنی ناوچه‌كانیان لە لایەن داعش ڕوویان له هه‌رێمی كوردستان كردووه. لە بەشێكی دیكەی قسەكانیدا باسی له كاریگه‌ری ڕۆڵی سه‌رۆك بارزانی له هاوكێشه‌كانی سیاسییەكانی عێراق و ناوچه‌كه كرد و ستایشی ڕاشكاوی و هه‌ڵوێسته‌كانی كرد، كه به‌درێژایی ته‌مه‌نی خه‌باتی جێگه‌ی متمانه‌ی گشت لایەك و هەموو پێكهاته‌كانی عێراق بووه و كاریگه‌ریشی له چاره‌سه‌ركردنی كێشه‌كاندا هه‌بووه. هه‌ر له‌م روانگه‌یه‌شه‌وه داوای له سه‌رۆك بارزانی كرد ڕۆڵی خۆی له نزیككردنه‌وه‌ی هێز و لایه‌نه سیاسیه‌كان و پێكهاته‌كانی عێراق بگێڕێ بۆ چاره‌سه‌ركردنی كێشه‌كان و به‌دیهێنانی شه‌راكه‌تی راسته‌قینه.
هه‌ر له‌و دیداره‌دا بارودۆخی مه‌یدانی به‌ره‌كانی شه‌ڕی دژ به تیرۆریستان له ئه‌نبار و سه‌لاحه‌دین و نه‌ینه‌وا خرایه به‌رباس و گفتوگۆ، بیروڕاش له‌باره‌ی دوا په‌ره‌سه‌ندنه سیاسیه‌كانی عێراق و ناوچه‌كه ئالوگۆڕ كرا و جه‌ختیش له‌وه كرایه‌وه، كه پێویسته لایه‌نه عێراقیه‌كان نه‌بنه به‌شێك له ململانێ سیاسیه تایفیه‌كانی. پەیوەست بە هەوڵەكانی بۆ چارەكردنی گرفتی پێكهاتەكانی عێراقی سەرۆك بارزانی ئەوەی خستەڕوو كە ئەوەی لە توانایدابێت بۆ مسۆگەركردنی شەراكەت و لێكنزیككردنەوەی لایەنەكان ئەنجامی دەدات.
ڕۆژی چوارشه‌مه 23/12/2015 لە سەلاحەدین به‌ڕێز مسعود بارزانی سه‌رۆكی هه‌رێمی كوردستان پێشوازی له شاندێكی حزبی زه‌حمه‌تكێشانی كوردستان كرد، كه پێكهاتبوو له به‌ڕێزان به‌ڵێن عه‌بدوڵا، به‌همه‌ن حسێن و سه‌عد خالید ئەندامانی دەستەی سەرۆكایەتیی حزبی زەحمەتكێشانی كوردستان.
له دیدارێكدا بارودۆخی سیاسی و ئه‌منی عێراق و ناوچه‌كه و شه‌ڕی تیرۆریستان خرایه به‌ر باس و گفتوگۆ. هه‌روه‌ها ستایشی رۆڵ و خۆڕاگری و قوربانیدانی هێزی پێشمه‌رگه‌ی كوردستان له شه‌ڕی روبه‌ڕووبوونه‌وه‌ی تیرۆریستانی داعش كرا.
هه‌ر له‌و دیداره‌دا بیروڕا له‌باره‌ی كێشه و قه‌یرانه ناوخۆییه‌كانی هه‌رێمی كوردستان و چۆنیه‌تی گه‌یشتن به چاره‌سه‌ر و كۆده‌نگی نیشتمانی له‌سه‌ر پرسه چاره‌نووسسازه‌كان ئالوگۆڕ كرا و جه‌ختیش له‌سەر كاركردن بۆ به‌دیهێنانی مافه ڕه‌واكانی گه‌لی كوردستان كرایه‌وه.
له دیداره‌كه‌دا شاندی میوان سوپاسی خه‌بات و هه‌ڵوێست و هه‌وڵدانی سه‌رۆك بارزانیان كرد بۆ پاراستنی مافه‌كانی گه‌لی كوردستان و تێكشكاندنی تیرۆریستان و سه‌رخستنی دیپلۆماسیه‌تی هه‌رێمی كوردستان لە ئاستی هەرێمایەتی و نێودەوڵەتی.
ڕۆژی چوارشەممە ٢٣ـی١٢ـی٢٠١٥ بەرێز مسعود بارزانی سەرۆکی هەرێمی کوردستان لە سەلاحەدین، پێشوازی لە فەخری کەریم سەرۆکی دەزگای ئەلمەدا بۆ رۆشنبیریی و راگەیاندن و هونەر و، سەرۆکی ئەنجوومەنی عێراقی بۆ ئاشتی و هاریکاری، کرد.
لەو دیدارەدا فەخری کەریم باسی رەوشی سیاسی و ئەمنیی عێراق و ئەو سەرکەوتنانە کرد کە لە بەرەکانی ڕووبەڕووبوونەوەی تیرۆریستان وەدەست هاتوون. هەروەها رۆڵی پێشمەرگە و هێزە عێراقییەکانی لە شکاندنی داعش بەرز نرخاند.
لە تەوەرێکی تری دیدارەکەدا باسی ئەو فشارە جەماوەرییە کرا کە ئامانجیان دەربازکردنی عێراقە لەو قەیرانانەی هەڕەشە لە وڵات دەکەن. جەختیش لە جێبەجێکردن و قووڵکردنەوەی چاکسازی و بەدەنگەوەچوونی داخوازییەکانی هاووڵاتییان، لەبارەی خزمەتگوزاری و ئەو پیشێلکاریانەی دژ بە دیموکراتیەت و ئازادییەکان دەکرێت، کرایەوە.
لە بەشێکی دیکەی دیدارەکەدا باسی ڕەوشی ناوخۆی هەرێمی کوردستان کرا و جەخت لەسەر یەکڕیزی و یەکخستنی تواناکان لە پێناو شکاندنی تیرۆریستانی داعش و بیری توندڕۆیی کرایەوە.
هەر لەو دیدارەدا جەخت کرایەوە کە پەیوەندیی نێوان هەولێر و بەغدا پتەو بکرێت، بۆئەوەی پێگەی هاوبەشی هەردوولا لە جەنگ دژی تیرۆر بەهێزتر بێت و، پرۆسەی چاکسازی دیموکراتی بەپێی خواستی عێراقییەکان، وەدی بهێنرێت.
دواجار فەخری کەریم ستایشی رۆڵی سەرۆک بارزانی کرد لە سەرکردایەتیکردنی روبەروبوونەوەی پێشمەرگە دژی داعش. سەرکەوتن و قوربانیدانەکانی پێشمەرگەشی بە پشتیوانییەکی بەهێز بۆ بەرەی عێراقی بۆ رزگارکردنی خاکی عێراق لە داعش وەسف کرد.
بە ناوی خوای مەزن و دلۆڤان
بە بۆنەی هاتنەوەی جەژنی لە دایكبوونی حەزرەتی مەسیح (سڵاوی خوای لێ بێت)، گەرمترین پیرۆزبایی ئاراستەی سەرجەم خۆشك و برایانی خۆشەویستی مەسیحی لە كوردستان و عێراق و جیهان دەكەم و هیوای جەژنێكی پڕ لە شادییان بۆ دەخوازم.
ئێستا كە عێراق و ناوچەكەمان لەژێر هەڕەشەی تیرۆر و توندڕۆیی دایە یەکێک لە ئەرکە سەرەکییەکانی هەموو لایەكمان پاراستنی پێکەوەژیان و تەبایی پێکهاتە جیاجیا ئایینی و نەتەوەییەکانە و نابێ ڕێگە بدرێت لەژێر هیچ پاساوێکدا ئەو تەبایی و پێکەوەژیانە تێکبدرێت.
بەداخەوە لەم ساڵانەی دواییدا خوشک و برایانی مەسیحی لە عێراقدا کەوتنە بەر هەڕەشە و نکۆڵیکاری، و لە ئەنجامی هێرشی دڕندانەی داعش شوێنە مێژووییەكان و شار و گوند و ناوچەكانی خوشك و برا مەسیحییەكانمان لە پارێزگای نەینەوا كەوتنە ژێر داگیركاریی تیرۆریستان.
سوپاس بۆ خودا لەسەر دەستی پێشمەرگە، تیرۆیستان تووشی شكستی گەورە هاتوون و پشت بە خوای مەزن شكستی یەكجارەكیان نزیكە و خوشك و برا مەسیحییەكانمان بە سەربەرزی دەگەڕێنەوە شوێنەكانیان. پێویستە دوای داعش ڕێوشوێنی وا بگیرێتە بەر كە چیتر كارەساتەكان دووبارە نەبنەوە و هەموو لایەك بە ئاشتی لەتەك یەكتردا بژیین. تاوان و دڕندەیی داعش دەبێ زیاتر هانمان بدات دەست بە بەها مرۆڤییەكانی گەلی كوردستان بە هەموو پێكهاتەكانیانەوە بگرین. خوشك و برا مەسیحییەكان لەوە دڵنیا دەكەمەوە كە كوردستان وڵاتی خۆیانە و گەلی كوردستان پاڵپشتی ئەوانە و دەبێ هەموومان بەیەكەوە بە سەربەستی و ئازادی بژیین.
هیوادارم ئه‌م جه‌ژنه ببێته مایه‌ی خێر و بەختەوەری بۆ ئێوە و هەموو ساڵێک لە سایەی ئارامی و ئازادیدا جەژنەکانتان پیرۆز بکەن.
مسعود بارزانی
سەرۆكی هەرێمی كوردستان
24ـی 12ـی 2015
بە ناوی خوای مەزن و دلۆڤان
خۆشحاڵم كە ئەمساڵ لەکاتێکدا جەژنی ڕۆژووی خوشك و برایانی ئێزیدی پیرۆز دەکەین کە پێشمەرگە قارەمانەکانی کوردستان، ئازادکردنەوەی شنگالیان وەک دیاری پێشكەشی خوشك و برایانی ئێزیدی و گەلی کوردستان کردووە. ئازادکردنەوەی شنگال شیاوترین پیرۆزباییە بۆ خوشک و برایانی ئێزدی لە کوردستان و سەراسەری دنیا و ساڕێژی برینی ئێمە و ئەو ئازیزانەیە.
پەیامم بۆ خوشک و برایانی ئێزدی و هەموو پێکهاتەکانی شنگال ئەوەیە کە ناوچەکەیان بە درێژایی مێژوو نموونەی پێكەوەژیانی نەتەوەیی و ئایینیی پێكهاتە جیاوازەكان بووە و پێویستە ئەو فەرهەنگەی پێكەوەژیان قووڵتر و دەوڵەمەندتر بكرێت لە دەڤەری شنگال و هەموو كوردستان و ڕێگە نەدرێت كە بە هیچ شێوەیەك زیان بە ئاسوودەیی خەڵك و فەرهەنگی پێكەوەژیانی كوردستانیان و خەڵكی شنگال بگەیەندرێت. هەروەها هیوادارم هەموو پێكهاتەكانی شنگال لەگەڵ لایەنە پەیوەندیدارەكانی حكوومەتی هەرێم كار بۆ ئەوە بكەن كە شنگال بە باشترین شێوە ئاوەدان بكرێت و هەروەها كاریش بۆ ئەوە بكرێت كە لەڕووی ئیدارییەوە ناوچەی شنگال تایبەتمەندیی خۆی هەبێت و بكرێتە پارێزگا.
لێرەوە خوشک و برایانی ئێزدی دڵنیا دەکەینەوە کە خەڵکی کوردستان پشتوپەنای ئێوەن و هیچ هێزێک ناتوانێت ئێوە لە گەلەکەمان داببڕێت و هەموو توانامان بۆ دابینکردنی ئایندەیەکی گەش بۆ ئێوەی خۆشەویست شان بە شانی گەلەی کوردستان، دەخەیەنە گەڕ.
هیوادارم ئه‌م جه‌ژنه ببێته مایه‌ی خێر و خۆشیی زیاتر بۆ خوشک و برایانی کوردی ئێزدی و ساڵ لەدوای ساڵ لە سایەی کوردستانێکی ئارام و ئازاددا و به‌خێروخۆشی و كامه‌رانی جەژنەکانیان پیرۆز بکەن.
مسعود بارزانی
سەرۆكی هەرێمی كوردستان
17ـی 12ـی 2015
بەناوی خودای مەزن و دلۆڤان
هاووڵاتیانی خۆشەویستی كوردستان
خۆڕاگریی گەلەكەمان و دلێری و قارەمانێتی پێشمەرگەكانمان لە هەموو قۆناغ و ڕۆژە سەختەكاندا بووەتە هۆی ئەوەی گەلی كوردستان هەمیشە بە سەربەرزی بمێنێتەوە. دوای ئەو كارەسات و ئەو شەڕە زاڵمانەی لە لایەنە تیرۆریستانی دوژمنی ئەخلاق و مرۆڤایەتی بەسەر گەلی كوردستاندا سەپێندرا هێزی پێشمەرگەی كوردستان بە خوێن و گیانفیدایی خۆی ئەفسانەی داعشی شكاند و بووە هۆی سەرسامیی جیهان، لە سایەی قوربانیدانی پێشمەرگە ئێستا هەموو مرۆڤایەتی بەچاوی ڕێز و ستاییشەوە سەیری گەلی كوردستان دەكات.
لە چەند ڕۆژی ڕابردوو پێشمەرگە لە چەندین داستانی بێوێنەدا دوایین هەوڵی تیرۆریستانیان بۆ پەڵاماردانی خاكی كوردستان تێك شكاند و زیانێكی زۆر گەوەرەیان لە دوژمن دا. لە شەڕێكی بیست و چوار سەعاتیدا داعش هەوڵیدا بە فراوانترین شێوە و بە باشترین هێز و چەك و تەقەمەنی و ژمارەیەكی زۆر ئۆتۆمبێلی بۆمبڕێژكراو پەلاماری پێشمەرگە بدات. ئەو هێرشەی تیرۆریستان بە گەورەترین هێرشیان هەژمار دەكرێت و ماوەی یەك مانگ خۆیان بۆ ئامادە كردبوو بەڵام پێشمەرگە قارەمانانە لەسەرجەم میحوەرەكان داعشیان تێكشكاند. دەستخۆشییان لێ دەكەم و بەرخودان و ئازایەتیان مایەی شانازین، هەروەها سوپاسی گەلی خۆڕاگری كوردستان دەكەم كە پشتیوانی پێشمەرگەن و ڕۆڵەی ئەوها ئازا و چاونەترس و نیشتیمانپەروەرەیان پێگەیاندووە بۆ بەرگریكردن لە خاك و نیشتیمان. سوپاسی پشتگیری و پاڵپشتیی ئاسمانیی هێزی هاوپەیمانانیش دەكەم كە لە شەڕەكاندا پشتیوانی هێزی پێشمەرگەی كوردستان بوون.
تیرۆریستان ویستیان لە ڕۆژی ئاڵای كوردستاندا پەلاماری كوردستان بدەن و ئاڵای كوردستان لە سەر لانەی شێران دابگرن بەڵام خەیاڵی تیرۆریستان و دوژمنان خاوە و ئاڵاكەمان لەسایەی خودای گەورە و قارەمانێتی پێشمەرگە و هیمەتی گەلەكەمان هەرگیز نەوی نابێ و بە بەرزی دەمێنێتەوە.
زۆر خەمبارم بە لەدەستدانی پۆڵێك پێشمەرگەی قارەمان، شەهیدبوونیان خەسارەتێكی گەورە بوو بۆ هەموومان. هەر پێشمەرگەیەك كە گیانی پاكی دەبەخشێ و شەهید دەبێ برینێك دەخاتە دڵی من، بەڵام باوەڕێكی تەواوم هەیە كە خوێنی پاكی شەهیدە سەربەرزەكانمان گەلی كوردستان بەرەو ڕۆژی سەركەوتن دەبات، هەروەها پابەندبوونمان بەرانبەر خاك و نیشتیمان و دواڕۆژی گەلی كوردستان زیاتر دەكات. گیانی شەهیدەكانمان هەوێنی سەربەرزی و سەركەوتنی گەلی كوردستانە. مەردایەتی و فیداكاریی ئەو ئازیزانە هەموومان مكوڕتر دەكات كە دەستبەرداری دۆزی ڕەوای گەلەكەمان نەبین و ئێرادەی گەلی كوردستان بۆ ڕووبەڕووبوونەوەی دوژمن و گەییشتن بە سەركەوتنی یەكجارەكی بەهێزتر دەكات.
سڵاو لە گیانی پاكی شەهیدان و هیوای چاكبوونەوە بۆ برینداران دەخوازم.
مسعود بارزانی
سەرۆكی هەرێمی كوردستان
19ـی 12ـی 2015